Thawngchia : Gangaw Ah Nu Fa Hna An Ruak Cu Thingkuang Chungah Hmuh An Si

Magwe ramthen, Gangaw Devision, Htilin District chung ah a um mi, Lawngbo khuasa hna Nufa cu mizei ti theih lomi nih nihin zing ah an thah hna lawng si loin, An Ruak zong Thingkuang chung ah an rak rawn ti a si.

Nihin July 28, 2021 zinglei suimilam 3:00AM tluk hrawng ah a cang mi asi. Htwe-Aoh (GAD) ah rian a ttuan mi pa, a nupi le a fapa te cu mizei ti theih lomi nih an rak thah hna hi asi.

“Nihin zing deihlan deuh te ah khan a si. Mizei dah an si timi zong theih a si lo. Hmaihuh he an rak ra. Htwe-Aoh (GAD) ah Cazi a ttuan mi Ko Chiang Thar thah ding in an rak luh hnawh hna. Ko Chiang Thar le a fapa kum(8) cu hliamhma tuar hnu ah an zam ko. A si nain a nupi le kum(10) lawng asi rih mi a fapa te cu an zam khawh lo caah zohchia ngai in an thah hna. Cun an ruak cu an cik dih i Thingkuang chung ah an rak rawn” tiah Khuami pakhat nih a chim.

Hi mithah lainawnnak kong he pehtlai in Gangaw pengkulh Police tuanvo ngeitu pawl kan pehtlaih ko hna nain, zeihmanh kan chim kho rih lo tiah lehnak an tuah ti a si.

Credit: Laikokek Journal