Fri. May 14th, 2021

Hakha, Cawbuk khualuhnak lei ah SAC ralkap le mipi runvengtu an i kap. SAC ralkap nih thazaang an chap. Khuami pakhat nih, “Atu hi Leisen tivakam in SAC ralkap le palik nih motor 6 nih an bawh ko hna,” tiah a chim. CCU ah a ummi saya pakhat zong nih, “Cawbuk ah an i kap ko,” tiah a chim. SAC lei in ralkap pakhat a thi tiah an ti nain cucu The Chin Journal nih a dang tein kan fehter kho lo.

Khuathar Billiard kahnak an luh hnawh lio ah minung pakhat zong ralkap nih an tlaih. Cawbuk kahdohnak kong pehzul in thawngthanh kan i zuam lai. Nihin zaanlei sml. 6:50 hrawng ah Hakha Khuathar ah SAC ralkap nih meithal voi 5 hrawng an puah. Zei ruang ah dah meithal an puah timi theih a si lo.

Khuathar Bosang ah a ummi Billiard kahnak hmun zong ralkap nih an luh hnawh. Mi an tlaihmi an um le um lo theih a si lo. Falam lei in Hakha ah a rak rami ralkap motor 6 zong sml. 7:10 hrawng ah Khuathar ah an rak phan.

SAC ralkap nih anmah misawhsawh thilpuan i hruk in meithal an i ken i mipi lak ah an i chokvak. An ralhriam thiarnak ah ralkap motor si loin chungkhar ngeihmi motor le motorcycle pawl kha hramhram in an chuh hna i an hman. Cucaah, i dohnak a chuah hnu ah cun mizapi lei nih umkal i ralrin a hau lai i, SAC ralkap nih nan motor an hman a si ahcun ttuanvo kan la lai lo,” tiah CDF-Hakha nih an langhter.

“Cun, misawhsawh thilpuan aa hrukmi SAC ralkap pawl cu nan hmuh hnanak hmun paoh ah mipi humhimnak ca ah tthio hna u law an meithal zong chuh khawh a si,” tiah cathanh ah an langhter chap. The Chin Journal

 

By admin