Russia President Putin Thinhunnak A Zualhma Taktak Hih

Finland Nih NATO A Fonh Ahcun Kan Ram Ca Ah A Him Lo, Kan Cawlcang Colh Lai – Russia
May 13, 2022.Russia nih Ukraine nichuahlei cu a kah cuahmah lio ah Finland nih North Atlantic Treaty Organisation(NATO) a fonh lai thawng a than caah, finland cu a lehrulh colh lai kong Russia nih a thanh. Finland nih cun fiang tein NATO fonh a timh kong a thanh cang i, Sweden zong nih NATO cu a fonh ve ṭheo lai, tiah ruah a si.

 

Finland nih NATO fonh a timh cu Russia nih an ram ca ah a him lo ti in, a rannak in a dohkalh colh i, Russia hrocer bantuk a si caah a herh ning in hma kan laak lai, tiah Russia nih a thanh. Finland le Russia hi ramri meng 800 tluk aa hrawm mi an si i, kum saupi cu NATO le Russia karlak ah ṭanh lei ngei loin Finland cu a rak um tawn. Sinain Ukraine lak i Russia cawlcanghning an hmuh tikah Finland nih cun NATO fonh tengteng hau dirhmun ah an dir kong an chim i, NATO an fonhnak a ruang bik cu Russia cawlcanghnak ruangah a si tiin Finland president nih Russia cu a lehrulh.

 

Russia nih Ukraine cu NATO fonh tim ti lo ding in a hro peng i, an ram an kahdohnak a ruang bik cu NATO fonh an timh ruang ah a si, ti in a thanh. March thla ahkhan Ukraine President nih cun NATO rak fonh manh hna sehlaw cu hi bantuk dirhmun an phanh lai a zumh lo kong a chim. Ukraine le Russia kahdohnak ah Russia ralkap zeimawzat cu Ukraine ramchung ah tlaih an si i, Russia ralkap hna cu raltuk phung ning lo in an cawlcangh ruangah ICJ ah biaceih an si te lai, tiah Ukraine nih a thanh.

 

Ukraine media nih an langhter ning ah cun Ukraine ah hin Russia ralkap ruak a tomtom in Ukraine ralkap nih an fimhlawm hna i, Russia lei cu rak vehvat ding in an theihter ko hna nain Russia nih a hna aa chehter. Cupinah Russia ralkap ruak an sin i a phan mi hna zong ṭha tein vui an tong lo, tiah an thanh. Russia nih Ukraine a kah thlathum a liam hnu ah, Ukraine nichuahlei cu thazaang faakpi in a nam ṭhan nain aa timh ning in a cawl kho lo. Russia ralkap zeimawzat cu hnu an tolh cuahmah lio, tiah Ukraine media nih cun an thanh.
Crd:TCP

 

SAC Nih Nawlngeihnak An Lak Kumkhat Leng Chung Ah Minung Nunnak 5600 Leng A Liam!May 13, 2022 .Myanmar ram ah SAC nih nawlngeihnak a laak hnu kumkhat leng chung ah sualnak ngeilo minung 5,645 tiang an nunnak a liam cang, tiah ISP nih nizaan May 12 ah a thanh. Tutan Myanmar nih a ton mi le SAC ralkap nih minung nunnak an laak mi bantum hi cuhlan tuanbia ah rak ton bal lo mi a si, tiah ISP Myanmar in U Kyaw Htat Aung nih RFA ah a chim.

 

SAC ralkap nih nawlngeihnak an laak hnu in Myanmar tuanbia ah ton bal lo mi hmuhton a si; firnak a tam, i dohnak le remlonak a karh, kahdohnak zong a tam caah mipi nunnak zong tampi a liam. Cu chung in SAC ralkap uk duh lo langhternak ah kah a tong mi le tlaihkhih ton hnu ah nunnak liam mi hna hi 1831 an si. Sagaing ramṭhen ah nunnak tam bik a liam i, nunnak a luam mi dihlak hi 599 an si.

 

SAC ralkap nih uknak a laknak cu kumkhat leng a si cang nain, tlaihkhih tong mi le hrem a tong mi an tam rih caah nunnak a liam mi cazin langhter mi cu karh lei a panh peng, tiah ISP Myanmar nih cun a langhter.
Hmanthlak: Ahlun
Crd:The Chin Post

 

CDM A Tuahtu SAC Ralbawi le Ralkap Pakhat Cu NUG MOD nih Laksawng An Pek Lai.May 13, 2022 .SAC ralkap sakhan pakhat in ralbawi pakhat le SAC ralkap pakhat cu an hriamthil tampi he CDM an tuah caah Pyituh Pantai(ပြည်သူ့ပန်းတိုင်) nih phaisa sing 30 an pek hna lai i, NUG Ministry of Defence(MOD) nih laksawng an pek chap hna lai, tiah Pyituh Pantai(ပြည်သူ့ပန်းတိုင်) phu nih an thanh.

 

SAC ralkap hmaikal sakhan in ralbawi pakhat le SAC ralkap pakhat cu SAC ralkap kuttang um duh ti lo in, chuah an duh caah Pyituh Pantai (ပြည်သူ့ပန်းတိုင်) phu sin ah pehtlaihnak an tuah. Pyituh Pantai nih NUG- MOD le KPICT sin ah bawmhnak an halpiak hna i, a himnak hmun ah an kal kho cang. Hriamthil tampi an i put khawh caah Pyituh Pantai phu nih sing 30 an pak hna lai i NUG Ministry of Defence zong nih laksawng an pek chap hna lai. SAC ralkap sakhan in hriamthil he CDM tuah a duh mi hna nih Pyituh Pantai phu sin ah pehtlaihnak tuah khawh kan si, tiah an langhter.
Crd:The Chin Post

 

Salin PDF Camp A Kaptu SAC Ralkap 3 An Thi.May 13, 2022 .Magway ramṭhen, SeHtutaya(စေတုတ္တရာ) peng Myoing Oo(မြောင်းဦး) khua kam ah Salin PDF camp cu SAC ralkap nih nihin May 13 ah an kah i, anmah lei 3 an thih caah hnu an kir ṭhan, tiah theih a si.Nihin May 13 zanlei sml 2:00 hrawng ah Salin PDF camp lei ah SAC ralkap pawl cu rallam an sial caah kap hnih kahdohnak a chuak, tiah Salin-PDF nih cathanh an chuah.

 

Kap hnih in kan i kap, hriamngan zong an hman ve. Kannih zong nih hriamngan in kan kah ve hna caah kan hriamngan kuan nih SAC ralkap 3 a khen hna i an thi colh,” tiah a chimchap.Kan camp hi kan chuah taak ko nain anmah lei thihnak khor chung kan hruai hna bantuk a si. Kan camp kan chuah taakmi ah bomb kan phum hna i lung hnih a puak. SAC ralkap lei in a thimi le aa hliammi cu kan hngal kho rih lo,” tiah Salin -PDF nih an langhter.

 

Mah te serchom meithal kan hman ko nain SAC ralkap lei 3 an thi. Meithal ṭhami hi NUG nih kan bawm kho sehlaw SAC ralkap pawl cu kan hloh dih hna lai, tiah an langhter chih.Cu kahdohnak ah Salin-PDF le anmah he ṭangṭi phu hna an i bawmh caah SAC ralkap lei hnu an kirnak hi a si, tiah theih a si.
Crd:TCP

 

Australia – ASEAN Economic Forum In SAC Ambassador An Hnon.May 13, 2022.SAC ralkap rian pek mi Ambassdor Tha Aung Nyunt cu May 23 ah tuah ding mi Australia -Asean Summit Economic Forum ah i tel lo ding in a min hnawh a si cang tiah Justice for Myanmar nih a thanh.

 

SAC Ambassador Tha Aung Nyunt cu Australia -Asean Summit Economic Forum ah lunglawmhnak bia chim ding in caan pek a rak si nain Victoria State Green Party lutlai pakhat i a biahalnak ruang ah a min an hloh tthan hi asi.

 

“Samantha Ratnam nih Australia -Asean Economic Forum ah Myanmar ram mizapi aiawhtu NUG palai sawm loin sual chimpit in a sualmi SAC palai hi zeiruang ahdah nan sawm? ” tiah nizaan i tuahmi Parliamentary meeting ah biahalnak a tuah.

 

Samantha Ratnam cu “Myanmar ram mizapi na kan dirpi caah kan i lawm” tiah Justice for Myanmar nih lunglawmhnak an langhter.Australia -Asean Economic Forum cu Australia ram Victoria State cozah tawlrelnak in tuah a si lai.
Crd:TCP

 

Tawngngyo Myotit Pawng Kahdohnak Ah SAC Ralkap 3 An Thi.May 13, 2022.Bago ramṭhen, Nattalin peng Tawngngyo Myotit pawng ah SAC ralkap hna cu Bago ramṭhen tualchung hriamtlai phu hna nih an rak kah hna i, SAC ralkap 3 an thi, tiah Bago Region PDF nih an thanh.

 

Nihin May 13, zinglei suimilam 8:00 hrawng ah Tawngngyo myotit pawng Gwaygyi(ဂွေ့ကြီး)khua le Ngawnglaypin(ညောင်လေးပင်) khua kar ah minung thazaang 30 hrawng he rallam a sialtu SAC ralkap hna cu Bago ramṭhen tualchung hriamtlai phu le Tayawady penkomh PDF battalion no. 3801 tat- khuai 2 le tat- khuai 3 nih an kah hna, tiah theih a si. Cu kahdohnak chung ah cun SAC ralkap 3 an thi i, hliamhma tuar mi zong an tam. Tualchung hriamtlai phu lei hliamhma tuar um lo in hnu an tolh ṭhan, tiah theih a si.
Crd:TCP

 

YeOo le Mungtapin Khua Ah Khua Mi 20 Ruak Hmuh A Si.May 13, 2022 .YeOo peng, Mungtapin (မုန်တိုင်ပင်) khua ah phung-ki 3 telh in khua mi 40 hrawng cu nizaan May 12 ah SAC ralkap nih ralphaw ca ah an tlaih hna hnu in, nihin May 13 zinglei ah khua mi 20 hrawng ruak cu hmuh an si, tiah tualchung mi nih an chim. SAC ralkap hna cu a luancia May 10 ah khuachung ah meithal i puah pah in an luh caah, tualchung mi hna cu a himnak hmun ah an zaam hna nain, hawi zaam lio ah zaam lo in khuachung ah a um mi cheukhat cu SAC ralkap nih an tlaih hna, tiah tualchung mi nih cun an chim.

 

Nihin May 13, ah tlaih a tong mi hna chung in nunnak a liam mi hna ruak cu khua pawng ah hmuh an si, tiah YeOo peng tualchung hriamtlai phu nih nihin May 13 zinglei ah an thanh. “Nizaan ah tlaih a tong mi hna chung in minung 8 cu an luat i, SAC ralkap kut in a luat mi hna nih cun, ‘Rawl zong an kan pe lo, nilin lakah an kan pho,’ tiah an chim. Nihin zinglei ah miruak hmuh mi 20 hrawng an si cang, cheukhat ruak cu an kut hri tem bu in mei an khangh hna, cheukhat cu an mui zong a fiang ti lo,” tiah Mungtapin (မုန်တိုင်ပင်) khua in a zaam mi pakhat nih BBC ah a chim.

 

Nihin May 13, ah SAC ralkap hna cu YeOo peng Pegyi(ပေကြီး) khuachung ah lut in khuachung inn 70 in 100 hrawng cu an hrawh i, facang tin 1,000 leng zong kan sung, tiah YeOo pah-kah-phah phu nih an thanh. SAC ralkap lei nih cun YeOo pengchung thil cang mi kong ah nihin May 13 chunhnu tiang ah thawngthanhnak an tuah rih lo.
Crd:TCP

 

North Dagon Peng Ah KBZ Bank Phaisa Phortu Motor Misual Nih An Zaampi.May 13, 2022.Yangon ramṭhen, Dagon Myotit peng no.32 sang Pinlung lam ah um mi Kanbawza (KBZ) Bank branch 1 hmai ah KBZ Bank phaisa phortu motor cu nihin May 13, zanlei suimilam 3:00 hrawng ah aho hngalh lo nih an chuh/fir, tiah theih a si.

 

Cu motor cu Yangon peng, KBZ Bank cheukhat ca ah phaisa phortu motor a si, tiah theih a si. Motor chuh an tonnak hmun cu Dagon Myotit KBZ bank hmai ah an si. Cu motor chung ah cun phaisa sing 10,000 mmk leng a um, tiah theih a si. KBZ Bank hmai i KBZ motor chuh an ton hnu ah SAC ralkap nih North Dagon pengchung lam tonnak le lam ṭhennak hna ah phihkhamnak le chekhlatnak an tuah, tiah tualchung mi nih an chim.

 

Pale Palik Sakhan Kahdohnak Ah SAC Ralkap 5 An Thi: Sagaing ramṭhen, Pale palik sakhan cu nizaan May 12, zaanlei suimilam 5:00 hrawng ah PDF phufonh nih an kahdoh hna. Cu kahdohnak ah cun SAC ralkap 5 an thi i, 10 leng nih hliam an tuar. Kaphnih kahdohnak cu suimilam pakhat le cheu tluk an rau tiah theih a si.

 

SAC ralkap a kaptu hna cu PDF phufonh minung thazaang 250 hrawng an si i, kahdohnak chung ah 120mm, 60mm, 80mm hriamngan hmang in SAC ralkap cu an kah hna, tiah Gyatitnat (ကျားသစ်နက်) pah-kah-phah in ṭuanvo ngeitu nih a chim.

 

Kahdohnak ah cun Gyatitnat (ကျားသစ်နက်) pah-kah-phah, Future generation pah-kah-phah, Lode Star le Burma Daung pah-kah-phah an i tel, tiah theih a si. PDF phufonh cu hliamhma tuar um lo in hnu an tolh, tiah theih a si.
Crd:TCP