Ralhraang Phu Chung Um CDF Sinah An I Fonh.Ralring Tein Rak Um Uh

Khah-mah-yiah 363 chung ummi tat-kyat-gyi telhin minung 3 cu CDF-KKG sin ah an i fonh.November 30, 2021 .Sagaing ramthen Kalaymyo Indailay(အင်ဒိုင်းလေး) khua khah-mah-yiah 363 battalion chung ummi tat-kyat-gyi cazi Mang Bawi Hring (private number- တ/497976) telhin ralhrang minung 3 nih ralhrang phu nawlngeihnak lakmi cu doh in Chin mi zapi vengtu phu-KKG sin ah an i fon tiah CDF-KKG nih nihin ah cathanh an chuah.

 

A tutiang ah Chin mi zapi vengtu ralkap phu (Kalay, Kabaw, Gangaw) sinah a fonmi hi minung 6 an si cang. Hriamthil tling he a fonmi hna cu phaisa laksawng pek nan si leng ah a humhimnak hmunhma nan phaktiang tawlrelpiak nan si lai tiah CDF-KKG nih cathanh an chuah.

 

A tuah CDF-KKG sinah CDM tuahin a lutmi hi minung 6 tiang an phan cang. Hriamthil, kuanfang tling he a fonmi hna lawng a humhimnak hmunhma ah chiah nan si lai i, laksawngah phaisa zong chuah nan si lai. Cun hriamthil le kuanfang a put lo mi hna cu tuanvo lakpiak nan si ti lai lo tiah theihternak an tuah.
Crd:The Chin Post/Khit Thit Media

 

Thawngdang:Yangon khua laifang motor pi-ke umnak cu mei khanghpiak an tong.November 30, 2021 .Yangon khua laifang Butathawng(ဗိုလ်တထောင်) peng Theinphyu(သိမ်ဖြူ) bu-choh lamcung motor pi-ke umnak hmunhma mei khanghpiak an ton caah nizaan zaan ah ralhrang phu hna nih cu ka hmun cu checkhlatnak an tuah tiah Yangon khuasa hna nih an chim.” Motor pi-ke umnak hmunhma mei a kang mi cu hmuh a si, ralhrang le palik phu zong an um, cu ka hmun cu an zoh hnu ah an kal than” tiah Yangon khuasami pakhat nih a chim.

 

Cun south Okkalapa peng no.4 sang, Parami(ပါရမီ) lam ah ummi ralhrang phu kuttang um company ta si mi Parami (ပါရမီယာဉ်) YBS 14 line bus pakhat chungah November 29, zaanlei suimilam 6:30 ah puahkehnak a chuak tiah theih a si.” Nizaan zaan lei ah Parami(ပါရမီ) bus chungah puahkehnak a chuak tiah kan theih, puahkeh thawng zong a thang tuk a si lo, minung aa hliammi zong an um lo ralhrang le palik cheukhat an rat cu hmuh a si” tiah cu ka hmun pawng ah a ummi pakhat nih a chim.Ralhrang phu ta si mi Parami(ပါရမီ) bus, Omini Focus bus hna cu i cit lo ding in le ralhrang thil chuah a simi hna cu hmanlo ding in dothlennak ah cawlcaangmi mino hna nih mi zapi sinah nawlnak cathanh an rak chuah cang.
Crd:The Chin Post/Khit Thit Media

 

Mindat – Matupi Meng tung 16 Lam Then Ah Ralhrang Bomb Lamh Ruangah U Zaw Ngai Thi.November 30, 2021 .Mindat- Matupi Lam, Meng tung 16 lam then ah ralhrang bomb lamh sual caah hliam atuar mi pafa chung in apa asi mi U Zaw Ngai cu nizan zan ah siikhan an phanh phi hnu ah athi tiah CDF – Mindat chimnak nawl ngeitu Ko Zaw Man sin in theih asi.

 

” An pahnih in kan va chanh hna siikhan ah kan kal pi hna. Lam ah bia hna an chim ko i an tha ko thinphan ding um lo tiah kan ruah. Sikhan kan phak bak ah a pa cu shock angah i sii khan kan phak bak in CPR pek colh a si. An chanh len nain a ngah ti lo, atha tuk ko nain athi tam tuk achuah caah ruah lo piin shock angah hi asi. Afa tu cu akut dong 2 abul. Kan mah lei siikhan ah cun pumhlainak ngan cu kan tuah kho lo. Hlainak khan tu cu aum ko, Sii Bawi zong aum ko ” tiah Ko Zaw Man nih achim.

 

Bomb nih puahmi 2 chung in apa U Zaw Ngai cu, PhuKhaYo(ဖိုးခယို) khua ah zing sml 11:09 ah a nunak aliam. Kum 2 asi mi afa pa te cu akut dong 2 abul i tu hi sii thlop lio pi asi tiah achim chap.Tu lio ah Mindat- Matupi lam ah hin CDF – Mindat nih uknam khua hna ah an um i CDF lei in bomb an hmat mi hna cu thianh dih an si cang i ralhrang nih hmanh mi vawlei chung phum mi bomb hna cu thianh ding ah ahar ngaingai tiah Ko Zaw Man nih achim.

 

Mah lam le hmunhma hna cu CDF nih uk asi cang i khuami hna zong khua ah an tlung pah cang. Ralhrang hna nih an riahnak hmun an kal nak hmun lam kip ah bomb an hmanh dih hna, bomb hna cu an taang rih. Kan mah nih kan hmanh mi hna cu kan thianh dih cang . Atu bomb hi cu ralhrang nih hmanh mi a si caah kawl ahar ngaingai. Bomb kawlnak seh kan ngeih lo caah ahar ngai ” tiah Ko Zaw Man nih Yangon khit thit ah achim.
Crd:The Chin Post Khit Thit Media

 

Thawngdang:Lentecelh: 2021 Ballon D’or Messi Nih A Co.November 30, 2021 .Vawleicung pumpululh chuihthuam hna nih laksawng vialte lakah an co duh bikmi pakhat Ballon D’or cu kum 2021 caah Leonel Messi nih a co. French Football nih a tawlrel mi Ballon D’or laksawng peknak caan hi tuzing lei ah khan Paris khuapi, Chatelet Theatre ah an tuah. Ballon D’or lengah vawleicung pumpululh chuihthuam hna chung in anmah zawn ah thiamnak bik a ngeimi hna zong laksawng pek an si. Hi laksawng cotu ding hna hi a tawlreltu hna lengah journalist min thang hna le ram pakhat pumpululh phu captain le coach nih vote thlak in an thim hna.

 

Kum 2021 caah Ballon D’or cotu Leonal Messi hi Ballon D’or laksawng voi-7 a conak a si. Amah changtu hi Portugal captain Cristiano Ronaldo a si i voi-5 a co ve cang. Messi hi Barcelona FC a chuahtaak hlan ah Copa del Rey hrai a thlirpi hna. Cupin ah an ram Argentina nih kum 28 chung international trophy an thlir khawh tilo hnu ah 2020 Copa America a laakpi fawn hna. Copa America zuamnak ah hin goal suut kho bik le midang suut ding chaan khotu bik a si fawn.

 

Nu pumpululh chuihthuam lei zong in Ballon D’or laksawng hi pek ve a si i, Spain le Barcelona pumpululh chuihthuam, kum 27 mi Alexia Putellas nih a co. Kum 21 tang lei pumpululh chuihthuam bik sinah an pek tawn mi Kopa trophy cu Barcelona le Spain laikal Pedri nih a co ve. Goal bawh thiam cem nih a co tawn mi Yachine trophy cu Italy le PSG goal veng Gianluigi Donnarumma sin ah pek a si.

 

Tukum Ballon D’or laksawng peknak ah hin voi dang ah an tuah bal lo mi laksawng dang an tuah chap mi an um. Striker of the year hi Polish le Bayern Munich hmaikal Robert Lewandowski nih a co i, Club of the year laksawng cu English club Chelsea nih an co.
Crd:The Chin Post