Myanmar Ram A Dawt Ahcun A Tthutdan In Min Aung Hlaing Hi ttum Seh

Min Aung Hlaing Nih Ram A Dawt Ahcun A Dirhmun In Ttum Seh: UN Palai Christine Schraner Burgener.Hramhram in nawlngeihnak latu ralhrangbu hotu Min Aung Hlaing cu UN palai Christine Schraner Burgener nih “Ram a dawt taktak ahcun a dirhmun khan tum seh” tiah a phomh. Oct 22 ah tuahmi UN General Assembly, minung hawi zawnruahnak le nunphung committee a voi 26 nak meeting ah UN nih Myanmar kongah a hlei in a chiahmi palai Christine Schraner Burgener nih a cunglei bantuk khin a chimmi a si.

 

Myanmar ram hi Min Aung Hlaing hruaimi ralhrangbu tangah a um ahcun zeitik hmanh ah a hmailei a dai kho lai lo. Ralbawizik Min Aung Hlaing nih Myanmar ram a hmailei zawn a ruah i a dawt taktak ko ahcun atu i a dirhmun khin tum sehlaw nawlngeihnak an lakmi kha mipi duhnak bantukin mipi thimmi cozah sinah pe than seh, cucu a si ko tiah Christine Schraner Burgener nih cun a chim.

See the source image

 

Christine Schraner Burgener nih cun atulio i Myanmar ah ralhrangbu nih nifatin in thatlonak an tuahmi, mipi an tlaihmi, thlong an thlakmi le an thahmi hna kong, ASEAN hnatlaknak phun 5 zong pakhat hmanh a zulh lonak kong, le amah pumpak hrimhrim in ton a herhmi hna he tonnak le biaruahnak ngeih in buainak tuahremh aa zuam lengmang nain atu tiang a hlawhtlin rih lonak kong zong meeting ah cun a chim.
Ref: RFA/TCP

See the source image

 

Thawng pang:Ralhrangbu Nih ASEAN Biakhiahnak An Cohlang Kho Lo, Sawm Lo Buin Meetingah Kai An I Tim.ASEAN Meeting Ah Min Aung Hlaing Sawm Lo Ding Timi Cu Ralhrangbu Nih An Cohlang Kho Lo, ASEAN Zulhphung Ningin Meeting Kai Khawhnak Covo Kan Ngei An Ti.

 

Tuthla ni 26-28 tiangh tuah dingo ASEAN hruaitu hna meeting ah ralhrangbu hotu Min Aung Hlaing sawm lo dingin biakhiahnak cu ASEAN zulhphung he aa kaih lo cash kan cohlang kho lo. ASEAN zulhphung ningin meeting kai khawhnak covo kan ngei tiah ralhrangbu nih Oct 22, tuni ah cathanh an chuah.

 

Ralhrangbu cathanh ah cun Oct 15 i ASEAN ramleng vuanci hna lakhruak meeting ah ASEAN meeting ah Myanmar aiawh in a kai dingmi kong ceihkhan a si i Min Aung Hlaing sawm ding timi zawn ah duhnak aa khah lo bantukin sawm lo ding timi kong zongah duhnak aa khat hlei lo. Asinain meeting a dih i ASEAN chairman nih cathanh a chuahmi ah an duhnak aa khat lomi kong a telhchih. Cucu ASEAN zulhphung Dal 20 (1) nak “Biakhianak tuah tikah ceihkhanti naak le lungthin khat sinak kha a hrampi a si lai” timi he aa kalh tiah an langhter.

 

ASEAN zulhphung dal 20 (1) nak ningah cun biakhiahnak cu zapi lungtlinnak in tuah ding ti a si. Lungkhahnak a um khawh lo ahun ASEAN zulkhphung dal 20 (2) nak bantukin ASEAN summit lawng nih biakhiahnak a tuah lai.

 

Oct 15 meeting ah khan ASEAN zulhphung hna cu an duhningin a sullam an i lak i lungkhah lonak a um ahcun dal 25 nak bantukin khuakhan a si lai. Cu zong i khuakhan lairel khawh a si lo ahcun ASEAN Summit ah chuahpi ding a si tiah ralhrangbu nih cun an cathanh ah an tial.

 

ASEAN ramleng vuanci hna meeting biakhiahnak cu ASEAN chairman nih a fehter than. Hihi a cung i kan langhtermi ASEAN zulhphung hna he aa tlak hrimhrim lo. Cucaah meeting sawm lo ding timi biakhiahnak cu zulh a har ti a si.

 

ASEAN zulhphung dal 5 nak ah chungte ram hna cu tlukruannak kan ngei dih. Dal 7 (1) nak ah ASEAN hruaitu hna meeting ah ram hotu, asiloah cozah hruaitu ngan hna an i tel lai ti a um caah Myanmar ralhrangbu nih hin ASEAN meeting kai khawhnak tling tein a ngei tiah rahrangbu nih an cathan ah an tial.

 

“An cathanh kha tha tein zoh law ASEAN biachahmi pakhat hmanh an zul lo. Meeting an ka sawm lo zongah ka kai thotho lai tiah a chim. Hi buainak Myanmar hi ASEAN chungtel sinak in caankarlak chuahmi dirhmun tiang a phan kho” tiah vawleicung hauap ramkhel thaimsang pakhat nih a chim.

Ref: Khet Thit Media/TCP