Fri. May 14th, 2021

Mindat CDF le SAC ralkap karlak ceihmainak a tlamtlin lo caah tu zaanlei sml. 6:00 hrawng in an i kap tthan. Peng/myone dang zong nih SAC ralkap pawl doh ding in Mindat mino nih forhfialnak bia an chim.

Mindat mipi le Myanmar SAC ralkap kahdohnak ah thazaang chap ding in Matupi in Mindat lei ah a kalmi ralkap motor cu Matupi le Mindat karlak ah mipi nih ruah lo piin an kah (Ambush) hna i ralkap 10 hrawng an thi, tiah CHRO nih a langhter. Mindat khua, Golf Club pawng kahdohnak zong ah Myanmar SAC ralkap lei in minung 5 hrawng an thi i SAC ralkap/palik motor pawl zong an khanghpiak hna.

Tu zaanlei sml. 6:00 tiang ah kahdohnak a dai rih lo. Pakukku lei in SAC nih ralkap thazaang chap an timh timi thawngpang zong a leng. Nihin zanlei sml. 3:30 hrawng ah aa thawkmi Mindat khua kahdohnak ah Myanmar SAC ralkap lei in minung 4 an thi i, palik le ralkap motor pathum zong mei in an khanghpiak hna, tiah kan theih.

Mindat ah SAC ralkap thazaang chap ding in Pakhuku le Matupi lei in ralkap motor pawl an kal, tiah khuami nih an chim.

Mindat mipi le SAC ralkap kahdohnak hi April 24 zaan khan a rak i thawk. SAC ralkap nih an tlaihmi Mindat mino 7 an thlah duh hna lo caah Mindat mipi nih Lai meithal pawl he an kah ve hna hi a si.

Mizoram, Lunglei khua i ram meikaang cu minung thazaang lawng in thah khawh a si ti lo caah Indian Air Force nih Helicopter in an rak thahpiak hna. Lunglei meikaang hi April 24 zinglei sml. 7:00 hrawng ah Saishi timi tlaang hrawng in aa thawk i Lunglei khua i Zotlang, Chenmari le Serkawn timi sang tiang a lawn.

Cun, Lunglei District chung lawng si loin Lawngtlai District lei tiang mei a lawn i meithat zung rianttuantu hna, Assam Rifle ralkap pawl, ramri congtu ralkap pawl le volunteer mipi i bawm in mei phelh an i zuam cuahmah. Hi Lunglei ram meikaang hi amah tein a thomi si loin minung pakhatkhat nih hramhram in (asioah) daithlan in an kanghter sualmi a si kho, tiah an zumh. | Credit: The Chin Journal

By admin