Khah Hi Pa Hi Dalaan Asi Tiruang Ah A Nunnak An Laak Cang Hih

PinLayBo Ah USDP Party Lutlai Mi Win Ting le Ngo Than Cu Dalan asi tiin an thah hna.November 30, 2021 .Sagaing ramthen, PinLayBo(ပင်လည်ဘူး) peng, USDP Party lutlai le palai hlun asi mi Win Ting le ralhrang thawngpe tu asi tiah lunghrinh mi Ngo Than hna pahinh cu tuni zinglei sml 8:00 ah meithal tlai cheukhat nih an kah i a hmun ah an thi colh tiah theih asi.USDP party palai Win Ting le ralhrang thawngpetu Ngo Than cu lakphak ti dawr an thut lio ah theih lo mi meithal tlai phu pakhat nih an kah hna i an pahnih in ahmun ah an thi colh, mahpinah USDP party palai hlun Win Ting a inn ah bomb a puak tiah theih asi.

 

USDP Palai Win Ting cu PinLayBo khuapi chaklei veng ah ralhrang he aa bawm i Democracy kong ah acawlcang mi hna cu tlaih nak, saikal 2 nak tam acit mi hna cu a tlaih hna, NLD party atanh tu hna cu atlaih hna, mino hna cu ralchanh in tlaihkihnak atuah tiah khumi hna nih an chim.USDP Palai Win Ting le Ngo Than i an ruak cu ralhrang nih an lak i an mah thah an tonnak he peh tlai in zei bantuk phu nih an tuah timi tu tiang ca thanh aum rih lo.U Win Ting cu 2020 thimnak ah PinLayBo(ပင်လည်ဘူး) Pyithu Palai ah azuam nain NLD party nih a tei mi asi.
Crd:The Chin Post/ Khit Thit Media

 

Thawngdang:Rampi ruahnak petu Daw Aung San Su Gyi cu biachahnak tuahpiak lo in December 6 ah an thawn.November 30, 2021 .Rampi ruahnak petu Daw Aung San Su Gyi cu hramhram nawlngeihnak la tu ralhrang phu nih rampi muichiatter tiah phungrelnak caang 505(a) in tazacuai a si nak a hmuh cu nihin November 30, ah biachahnak tuahpiak lo in December 6,ah a ni an thawn piak than tiah biaceihzung he neihniam in ummi hna sin in theih a si.

 

Rampi ruahnak pe tu Daw Aung San Su Gyi le president U Win Myint nih an tonmi a hmuh chung in pawngkam thil tihnung a chuakkhomi tawlrelnak (သဘာဝဘေးအန္တရာယ်ဆိုင်ရာစီမံခန့်ခွဲမှု) u-pa-di poh-mah 25 in taza cuai an sinak kong ah tat-te a si mi Mandalay Oobu(အိုးဘို) thonginn ah chiahmi Dr Zaw Myint Mawng cu a ngandamnak a that cang caah auh ding in sih-ni hna nih an langhter na in, ralhrang kuttang riantuan mi biaceihtu nih December 6, ni ah biachahnak tuah ding in a chim.

 

Myanmar democracy hruaitu, noble deihnak laksawng cotu pakhat si mi Daw Aung San Su Gyi cu hramhram nawlngeihnak la tu ralhrang phu hna nih diklo ning in a hmuh 11 tiang taza cuainak an tuah i, cu taza an cuainak a hmuh hna cu kum caan saupi tiang thong thlak khawhnak poh-mah an si tiah theih a si.Crd:The Chin Post/Than Lwin Khet

 

Thawngdang:Depeyin peng ah ralhrang nih ni 3 chung pehtlai in an luhhnawh hna leng ah raltuknak vanlawng in an doh hna.November 30, 2021 .Sagaing ramthen, Depeyin (ဒီပဲယင်း) peng ah ralhrang phu nih ni 3 chung pehtlai in khuachung ah an luhhnawh hna. Nihin zinglei zong Ngawnghlah(ညောင်လှ) khua cu mei in a khangh tiah khuachung mi hna nih an chim.

 

Nawlngeihnak la tu ralhrang phu nih November 27, ni ah ral tuknak vanlawng telhin vanlawng 5 he Depeyin (ဒီပဲယင်း) peng Ngawnghlah (ညောင်လှ) khua pawng ah van lei in ralhrang phu hna kahdoh an bawmh hna. Cun ni zaan ah Ngawnghlah (ညောင်လှ) khua cu ralhrang phu nih umhmun khuarnak ah an hman tiah khuami nih an chim.

 

Ngawnghlah (ညောင်လှ) khuami pakhat nih cun ” Ngawnghlah (ညောင်လှ) khua cu a hleiin hlathlainak an tuah, inn khat hnu inn khat ah an lut, thilri a lak le lak lo cu inn kan phanhthan hnu lawng ah theih a si lai, kan nih zong hmundang ah kan zaam dih cang hna. Vanlawng in minung a rak thlahmi hna phu khat, hna nih cun Ngawnghlah (ညောင်လှ) khua cu an kah caah a pawnghrawng khua hna zong hmundang ah an zaam dih cang” tiah a chim.Depeyin (ဒီပဲယင်း) peng ummi khua 10 leng in khuami hna cu ralhrang phu luhhnawh ruang ah hmundang ah an zaam hna tiah theih a si.
Crd:The Chin PostThe Irrawaddy

 

Thawngdang:Yangon khua laifang motor pi-ke umnak cu mei khanghpiak an tong.November 30, 2021 .Yangon khua laifang Butathawng(ဗိုလ်တထောင်) peng Theinphyu(သိမ်ဖြူ) bu-choh lamcung motor pi-ke umnak hmunhma mei khanghpiak an ton caah nizaan zaan ah ralhrang phu hna nih cu ka hmun cu checkhlatnak an tuah tiah Yangon khuasa hna nih an chim.” Motor pi-ke umnak hmunhma mei a kang mi cu hmuh a si, ralhrang le palik phu zong an um, cu ka hmun cu an zoh hnu ah an kal than” tiah Yangon khuasami pakhat nih a chim.

 

Cun south Okkalapa peng no.4 sang, Parami(ပါရမီ) lam ah ummi ralhrang phu kuttang um company ta si mi Parami (ပါရမီယာဉ်) YBS 14 line bus pakhat chungah November 29, zaanlei suimilam 6:30 ah puahkehnak a chuak tiah theih a si.” Nizaan zaan lei ah Parami(ပါရမီ) bus chungah puahkehnak a chuak tiah kan theih, puahkeh thawng zong a thang tuk a si lo, minung aa hliammi zong an um lo ralhrang le palik cheukhat an rat cu hmuh a si” tiah cu ka hmun pawng ah a ummi pakhat nih a chim.Ralhrang phu ta si mi Parami(ပါရမီ) bus, Omini Focus bus hna cu i cit lo ding in le ralhrang thil chuah a simi hna cu hmanlo ding in dothlennak ah cawlcaangmi mino hna nih mi zapi sinah nawlnak cathanh an rak chuah cang.
Crd:The Chin Post/Khit Thit Media

 

Mindat – Matupi Meng tung 16 Lam Then Ah Ralhrang Bomb Lamh Ruangah U Zaw Ngai Thi.November 30, 2021 .Mindat- Matupi Lam, Meng tung 16 lam then ah ralhrang bomb lamh sual caah hliam atuar mi pafa chung in apa asi mi U Zaw Ngai cu nizan zan ah siikhan an phanh phi hnu ah athi tiah CDF – Mindat chimnak nawl ngeitu Ko Zaw Man sin in theih asi.

 

” An pahnih in kan va chanh hna siikhan ah kan kal pi hna. Lam ah bia hna an chim ko i an tha ko thinphan ding um lo tiah kan ruah. Sikhan kan phak bak ah a pa cu shock angah i sii khan kan phak bak in CPR pek colh a si. An chanh len nain a ngah ti lo, atha tuk ko nain athi tam tuk achuah caah ruah lo piin shock angah hi asi. Afa tu cu akut dong 2 abul. Kan mah lei siikhan ah cun pumhlainak ngan cu kan tuah kho lo. Hlainak khan tu cu aum ko, Sii Bawi zong aum ko ” tiah Ko Zaw Man nih achim.

 

Bomb nih puahmi 2 chung in apa U Zaw Ngai cu, PhuKhaYo(ဖိုးခယို) khua ah zing sml 11:09 ah a nunak aliam. Kum 2 asi mi afa pa te cu akut dong 2 abul i tu hi sii thlop lio pi asi tiah achim chap.Tu lio ah Mindat- Matupi lam ah hin CDF – Mindat nih uknam khua hna ah an um i CDF lei in bomb an hmat mi hna cu thianh dih an si cang i ralhrang nih hmanh mi vawlei chung phum mi bomb hna cu thianh ding ah ahar ngaingai tiah Ko Zaw Man nih achim.

 

Mah lam le hmunhma hna cu CDF nih uk asi cang i khuami hna zong khua ah an tlung pah cang. Ralhrang hna nih an riahnak hmun an kal nak hmun lam kip ah bomb an hmanh dih hna, bomb hna cu an taang rih. Kan mah nih kan hmanh mi hna cu kan thianh dih cang . Atu bomb hi cu ralhrang nih hmanh mi a si caah kawl ahar ngaingai. Bomb kawlnak seh kan ngeih lo caah ahar ngai ” tiah Ko Zaw Man nih Yangon khit thit ah achim.
Crd:The Chin Post Khit Thit Media