Fri. May 14th, 2021

Hakha, Cawbuk sang lei ah kahdohnak a chuah hnu nihin May 3 ah Hakha khuachung ah SAC ralkap pawl thazaang tam ngaiin an i choklet hna. Chun sml. 2:00 hrawng zong ah SAC ralkap motor a nganmi le a fami telh in motor 14 hrawng Hakha Market hmai ah an dir hna i a rauh hlan ah Lansone lei ah an ttum hna. Hakha khuachung ah kha hlan nakin mi an king i, dawr cheukhat zong an khar hna.

Hakha, Cawbuk sang Check Point kahdohnak ah SAC ralkap 4 an thi, tiah CDF nih Mizzima thawngzamhnak ah an fehter. CDF upa pakhat nih, “Matupi in Hakha lei rak luhnak ah SAC ralkap check point a um. Cuka ah cun ralkap 7 an um i CDF nih kan kah hna. Minung 4 fak ngaiin kan hliamh hna i pakhat cu a hmun ah a thi. A dang pawl zong an thi tiah chim khawh a si ko. Kanmah CDF lei in cun aa hliammi kan um lo,” tiah a chim.

Anmah CDF Page zong ah “CDF-Hakha le SAC ralkap kahdohnak ah SAC lei in a tlawm bik minung 4 an thi,” tiah an fehter. Zaan sml. 6:45 hrawng in kahdohnak a chuak i sml. 8:00 hrawng ah kah thawng a dai. Kahdohnak a chuahnak hmun lei ah ralkap motor zong an kal i, kiangkap khuasa pawl hmun dang ah aa tthialmi an um hna, tiah kan theih.

Nihin zinglei sml. 10:00 hrawng ah Kachin ramkulh, Moemok peng, Kunglawng khuate pawng ah KIA nih SAC ralkap helicopter pakhat tla lak in an kah, tiah Kachin thawngzamhnak pawl nih an langhter. Helicopter aa citmi SAC ralkap minung 3 an thi. SAC helicopter KIA nih an kah hnu ah SAC lei nih bomb pawl kunglawng khuachung an rak kah i kum 60 upa pakhat le phungki pakhat an nunnak a liam.

By admin