Chinram Chung Um Khrihfa Biakin Khangh Asi

Falam peng, Parte khua biakinn le inn pahnih khanghpiak a si.2022 May 13 – Chin ramkulh, Falam peng, Falam-Kalay lam cungah a ummi Parte khua JCC biakinn le mipi inn 2 cu May 10 ah SAC ralkap nih an khangh tiah khuami hna nih RFA ah an chim.

 

May 10 zinglei ah SAC ralkap pawl nih Falam khua an ummnak tlang in Parte khua lei ah hriamngan in an rak kah hnu a zaanlei ah mahka khua cu a tu bantuk in an khangh hi a si tiah khuami hna nih an chim.Kan hnuzarh chungah SAC ralkap mawṭaw thluan cu lam cungah CDF nih bom an puah hnawh hna caah a thimi an rak tam.

 

May 3, Hakha khua in aa rak thawhmi SAC ralkap mawṭaw thluan cu Hakha-Falam karlak ah inn 20 leng an khangh ruangah a pawngkam khua 6 in khuami hna cu ramlak ah an rak zaam tiah theih a si.
Ref: RFA
Editor
The Chinland Post

 

Gospel Ministry International(GMI) Nih Ralzam Hna Caah Moral Support Crusade An Tuah!
Gospel Ministry International (GMI)nih Rambuai ruang ah mah inn lo chuahtak in khuate lei ah Ralzam dirhmun in a dormi hna,Lungdong ngai in a um mi hna caah moral support Crusade an tuah piak hna.

 

Hi Moral Support Crusade an tuahnak hmun hi Thantlang peng Tikir khua ah tuah a si i, cawnpiak tu an sawmmi hna cu, Rev.Mang Kam, le Hlasakthiam Lal Tha Chin Sang,PBK Liankhuma hna le hlasak thiamdang dang hna zong nih an telpi khawh hna.

 

Gospel Ministry International (GMI) nih ai tinh bik mi cu ralruang ah inn le lo chuahtak in mi khua le mi ram ah ai dor mi hna, Pathian bia in thazang pek nak le an lungtthawnter kha ai tinh bik mi cu asi.

 

Thantlang peng Ralzam tamnak bik Salen khua zong ah May 16-23 tiang Ralzam hna thazang peknak Moral Support Crusade an tuah rih lai tiah theih a si.
Crd:TCP

 

Lashio- Muse lam ah civil motor hmang in a thli in a umkal mi ralhraang hna cu PDF tangti phu komh nih an kah hna i ralhraang 20 an thi, PDF 2 nih an nunnak an pek ve.

 

May 12, 2022.Shan ramkulh chaklei, Muse peng Lashio-Muse motor lam ah civil motor in a thli in a umkal mi council ralhraang pawl cu PDF tangti phu komh nih an kah hna i ralhraang 20 an thi, PDF lei 2 an thi ve tiah People Security And defence Army – Muse nih thawng an thanh.

 

May 4 zaanlei suimilaam 5:40 ah Lashio-Muse motor lampi chung ah LIB-214 le LIB-420 battalion hna cu private motor 5 in Muse lei an kir lio, Mawtaung khua le Talone khua kar, Namhpataan lamthen phanh lai ah Muse PSDA le PDF battalion 111 le 222 tangti phu nih an kah hna i ralhraang 20 an thi tiah kan theih.

 

Ralhraang lei a thi mi 20 le hliamhma tuar 4 an um. Kanmah lei in pahnih an thi i pathum hliamhma tuar an um” tiah PSDA chungtel pakhat nih Khit Thit Media ah a chim.
TheHakhaPost

 

Karenni peng ah SAC ralkap mawṭaw thluan bom puah hnawh a tong, SAC ralkap mawṭaw 5 leng a rawk.2022 May 13 – Karenni peng ah SAC ralkap mawṭaw thluan cu KNDF Battalion 16 le Karenni Army (KA) hna fonh in bom an puah hnawh lengmang hna caah SAC ralkap mawṭaw 5 nak tlawm lo a rawk i a thimi an tam kho tiah KNDF nih May 12 ah a thanh.

 

May 7 ah KNDF Battalion 16 le KA fonh in SAC ralkap mawṭaw thluan cu an puah hnawh hna, SAC ralkap mawṭaw 3 a rawk i a thimi an tam, a rawkmi SAC ralkap mawṭaw 3 cu Karenni phufonh nih mei in an khangh tiah theih a si.

 

Cu bantuk in, May 4 ah SAC ralkap mawṭaw thluan cu KNDF Battalion 16 le KA phufonh ṭhiamṭhiam nih bom an puah hnawh i SAC ralkap mawṭaw 2 a rawk, SAC ralkap a thimi an tam tiah KNDF thawngthanhnak in theih a si.
Editor
The Chinland Post

 

SAC pawl hmunhma an khuarnak cu CNDF phufonh nih an kah , SAC ralkap 7 an thi, 5 nih hlianhma an tuar.2022 May 12 – Sagaing ramṭhen, Kalay khua chungah a ummi SAC ralkap pawl hmunhma an kuarnak hmun 3 cu CNDF phufonh hna nih May 10 zaanlei ah an kah hna i SAC ralkap 7 an thi, 5 nih hliamhma an tuar tiah CNO/CNDF nih a thanh.

 

Kalaymyo, Taungphyila sang ah a ummi cozah rianṭuan pawl an umnak inn dot 4 ah hmunhma a khuarmi SAC ralkap pawl cu CNDF nih May 10 zaan sml 8:00pm ah a thli tein an kah hna caah ralkap 6 an thi tiah theih a si.

 

Sanmyo sang ah a ummi riithai zung cu CNDF phufonh nih an kah hna lioah SAC ralkap 1 a thi i 3 an i hliam, Tahan sang Naycia inn pawngah a ummi SAC gate cu an kah ṭhan hna i SAC ralkap 2 an i hliam tiah CNO/CNDF nih a thanh.

 

SAC ralkap pawl cu CNDF, PDF-Kalay, CSS, GRF phu hna fonh in an kah hi a si i phufonh hna nih hliamhma tuar lo tein an kirtak khawh hna tiah theih a si.Kahdohnak lioah SAC ralkap nih hriamngan in kah thlorh an kah ruangah inn pakhat a khen i mipi pahnih an i hliam tiah theih a si.
Editor
The Chinland Post

 

Ukraine raltuknak ah mipi 3,300 leng an thi.2022 May 13 – Russia nih Ukraine a tuknak zarh 11 chungah mipi 3,381 an thi tiah UN Human Rights Watch nih May 12 ah a chim.

 

Ukraine ngiathlaitu phu ah chiah a simi UN phu chimning ahcun mipi tam deuh cu a fak tukmi bom puahnak pawl, hriamngan le van lei dohnak ruangah a thimi an si tiah a chim.

 

Mah cazin hi aa naih bik in ruahdamhmi a si i a taktak ah a thimi cazin hi a thong nak in an tam deuh kho men tiah Geneva thawngzamh nih a langhter.

 

Mariupol khua ah mipi zeizah dah an thih timi theih khawhnak ding caah, thil sining le thawngpang hlatding ah harnak a um tiah a langhter.Russia nih February 24 in a thokmi Special Operation ah mipi tinh in kahdohnak tuahmi a um lo tiah bialehnak a tuah ve.
Ref : DVB
Editor
The Chinland Post

 

Kahdohnak thawng: Ralhrang 34 an thah hna, 20 tluk hliamh an si .2022 May 13 —- Miphun hriamtlai CNA, CDF-Thantlang, CDF-Zophei le CNDF i bawm in May 3-6 kar ah ralhrang Kawl Ralkap a tlawm bik voi 4 tluk an dohnak ah Kawl Ralkap 34 an thah hna i, 20 tluk an hliam hna. Tutan kahdohnak ah ralhrang nih Chin miphun thongtla 15 tluk kha ralkham (human shield) ah an hman hna, cun Ramthlo ah inn 10, Tlangzaar ah UPC Biakinn telh in inn 16 an khangh tiah CNF nih cathanh in a langhter.

 

Hi Hakha le Falam kar kahdohnak ah miphun hriamtlai CNF in 4 le CDF Thantlang in 4 nih nunnak an pek tiah theih a si. (Kahdohnak a can dihka te ah thawngzamhnak tampi Chinland Post telh in minung 9 tiah rak thanh a si nain, CNF nih 8 in a langhter).
The Chinland Post