CDM A Tuah Mi Police Nih Pafa An Thah Ko Hna Hih

Palek Panga Nih CDM Kan Tuah Lai Tiin Pafa Pahnih An Hlen I An Thah Hna.Sagaing ramthen Kanbalu peng, Chet Tin palek sakhan in palek panga nih CDM kan tuah lai tiin Kangyi khuami U Tin Tun le a fapa Kaung Thiha cu an auh hna i biahalnak hmun ah an thah hna tiah khuami hna nih an chim.

 

Oct 20, zanlei suimilam 4 ah Kanbalu peng Chet Tin palek sakhan ah a ummi palek panga hna nih Kangyi khuami U Tin Tun (kum 49) le a fapa ngakchia bik Kaung Thiha (kum 21) cu CDM tuah kan duh cash saikel pathum kan herh tuk, nan kan bawm kho hnga maw tiin an hlen hna.

 

U Tin Tun le a fapa cu palek panga hna bawmh dingin Kangyi khua in Chet Tin khua lei an kal lioah palek nih an tlaih hna i Oct 21 ah ralhrang biahalnak hmun ah an thah hna tiah theih a si. U Tin Tun le a fapa thihnak kongah ralhrang nih cun an tak cungah tuahchom bomb kan hmuh i dir u kan ti hna nain an dir duh lo caah kan kahmi hna a si tiin lih le hrokhrawl in thawng an thanh, tiah khuami hna nih an chim. Ref: Khet Thit Media

 

News dang: Thluaklei tlamtling lomi nih hringtu a pa telh in minung 4 naam in a thah hna.Chin ramkulh, Mindat peng Makiu Ingnukhua ummi Maung Zawng Thang (Kum 36) nih October 22 chun ah hringtu a pa telh in minung 4 hna cu tlanglo facang an cil lioah ruahlo piin naam in a thah hna, cun midang pahnih zong a hliamh hna tiah theih a si.

 

A thahmi minung 4 lakah kum 60 a upa cangmi nu zong ai tel ve tiah theih a si i ai hliammi minung pahnih lakah pakhat cu kum 5 ngakchia a si. Maung Zawng Thang hi PCM Khrifabu Pastor (Pension) U Thang Ling Bu (Kum 60 hrawng) i a fapa fangkhat te a si. A chuahka tein Vok zawtnak( Watzu) a ngeimi si.

 

“Pastor pa a dawtu pawl nih a lo facang tuan an bawmh. Anih hi cu hlan cu mi zong harnak a pe balmi a si lo, thlapa lai lio si caah a zawtnak a puan bia zong si kho. Cun ram buairuang le zawtnak ruangah lengchuah a ngahlo caah thinlung retheih ruangah ruahlo piin a zawtnak a zual zong asi kho. Khua upa nih an tlaih i an hren ko ” tiah khuami pakhat nih cun a chim.

Source: Zalen/TCP